الأسبوع الماضي، يوم ١٨ أكتوبر، كان اليوم العالمي لانقطاع الطمث، أو الـ«مينوبوز». مرحلة لها اسم طبي محترم، واسم اجتماعي مستفز: «سن اليأس». كأن الست بعد عقود من الدورة الشهرية والحمل والولادة، ما بيكونش ليها أمل في أي حاجة تانية في الحياة، ولا حتى العيش بلا ألم. والحقيقة إن أكثر ما يدعو لليأس أحيانًا هو طريقة التعامل مع شكواها.
تتخيلي إنك أخيرًا هتخلصي من قرف البيريود، فتكتشفي إن جسمك كان بيجهز للموسم الجديد: هبّات ساخنة، عرق ليلي، أرق، إرهاق، وتقلبات مزاجية. تصحي مبلولة كأن حد رماكي في حمام سباحة، وتقفي قدام التلاجة مش فاكرة فتحتيها ليه، وتنامي وكأنك نايمة جوه فرن بلدي. وبعد ده كله، فيه اللي يسألك بمنتهى البراءة: ”إنتِ عصبية كده ليه؟“.
مش كل الستات بيمروا بالأعراض نفسها أو بالشدة نفسها، لكن اللي بتتعب فعلًا ممكن تلاقي نفسها وحيدة تمامًا. معلومات قليلة، وكلام مبهم عن أعراض الكل شايف إنه عيب تتكلمي عنها، وعيادة تدخليها على أمل الخروج بحل، فتخرجي بالجملة الطبية الأشهر: ”استحملي يا مدام، جسمك هيتعود على كده“.
طب ولحد ما يتعود؟ أعلّق حياتي على الشماعة؟ أبعت للشغل أقول لهم هارجع لما الهرمونات تستقر؟ ومين قال إن مجرد كون الأعراض شائعة يخلي احتمالها واجب؟
أما لو سألتي عن العلاج الهرموني، فبالتأكيد هتسمعي الجملة اللي بتنهي المناقشة قبل ما تبدأ: «هيجيلك سرطان». كداهه، من غير تفاصيل، ولا تقييم لتاريخك الصحي، ولا شرح للفرق بين أنواع العلاج.
المعرفة الطبية أدق من التخويف ده. العلاج الهرموني مثلا قد ترجح كفة فوايده على مخاطره عند الكثير من النساء، خصوصًا قبل الستين أو خلال عشر سنوات من بداية انقطاع الطمث، بعد تقييم فردي، ومعرفة بتاريخ العائلة المرضي.
لكن علاقتنا بالاستهانة بألم النساء أقدم من المينوبوز بكثير. في بعض التصورات الطبية اليونانية القديمة، كانوا متخيلين إن الرحم ممكن يسيب مكانه ويتجوّل داخل الجسم، وتُنسب لحركته اضطرابات مختلفة. وأصل كلمة «هيستيريا» يرجع إلى «هستيرا»، الكلمة اليونانية اللي بتعني الرحم. يعني تخيلوا عضو داخلي يقرر يعمل جولة سياحية، ثم بنوا على التخيل ده تفسير لكل معاناة النساء النفسية..
طبعًا الطب اتقدم، لكن آثار النظرة اللي بتجعل جسم الرجل هو النموذج الأساسي للدراسات الطبية ما اختفتش بسهولة. يكفي أن إدراج النساء في الأبحاث السريرية الممولة من المعاهد الوطنية للصحة الأمريكية احتاج إلى إلزام قانوني سنة ١٩٩٣
. يعني جسم نصف البشر احتاج قانون يؤكد أهمية دراسته،.
فتحياتي يعني و الله لكل واحدة بتصحى على وجع دورة، أو تعب حمل ورضاعة، أو عذاب بطانة رحم مهاجرة، أو أرق وهبّات ساخنة في مرحلة ما قبل انقطاع الطمث وبعده، ثم تنزل ”أسد يالا فيه إيه“ء: تشتغل، وتراجع الواجبات، وتدير البيت، وتربي العيال، وتشيل هموم أبوهم كمان.
في اليوم العالمي للمينوبوز، نفسي الست تدخل العيادة فتلاقي حد يسمعها قبل ما يطلب منها تستحمل..
“استحملي يا مدام“ ممكن تبقى نصيحة من جارة. إنما في العيادة، إحنا دافعين الكشف عشان نسمع إجابات تانية وحلول حاسمة.
الرسالة الإخباريةأبرز الأحداث الدولية صباح كل يوم
اشترك